Üzeyir Hacıbəyli adına Bakı Musiqi Akademiyasının Şövkət Məmmədova adına Opera Studiyasının səhnəsində Vladimir Vısotskinin doğum gününə həsr olunmuş ədəbi-musiqili gecə keçirilib. Tədbir VTB (Azərbaycan)-ın sponsorluğu ilə təşkil olunub.
Gecənin proqramında Azərbaycanın əməkdar artistlərinin, teatr və kino aktyorlarının, estrada müğənnilərinin, eləcə də “Bakı” Müəllif Mahnıları Klubunun nümayəndələrinin ifasında mahnılar və şeirlər yeni təqdimatda səsləndirilib. Rəqs nömrələrini isə dövlət teatrlarının solistləri və quruluşçu-xoreoqraflar təqdim ediblər.
Tədbir çərçivəsində Vladimir Vısotskinin Azərbaycanla şəxsi və yaradıcılıq əlaqələri xüsusi olaraq vurğulanıb. O, gənclik illərində ailəsi ilə birlikdə dəfələrlə Bakıya səfər edib, yetkin yaşlarında isə burada istirahətdə və çəkilişlərdə iştirak edib. Sənətkarın Bakıya son səfəri onun vəfatından az əvvəl baş tutub və bu səfər rejissor Mixail Şveytserin “Kiçik faciələr” filminin bəzi epizodları üzərində işləmək məqsədi daşıyıb.