Bu gün Şuşa şəhərində Azərbaycanla Latviya arasında iqtisadi, elmi, texniki və mədəni əməkdaşlıq üzrə Hökumətlərarası Komissiyanın 9-cu iclası baş tutacaq.
BBN.az xəbər verir ki, bu barədə Report İnformasiya Agentliyi məlumat yayıb.
İclasda Azərbaycan tərəfdən Xarici İşlər Nazirliyi, İqtisadiyyat Nazirliyi, Energetika Nazirliyi, Mədəniyyət Nazirliyi, Təhsil Nazirliyi, Rəqəmsal İnkişaf və Nəqliyyat Nazirliyi, Dövlət Turizm Agentliyi, Dövlət Gömrük Komitəsi və Azərbaycan Mərkəzi Bankının nümayəndələrinin iştirakı nəzərdə tutulur. Latviya tərəfdən isə müvafiq dövlət qurumlarının rəhbər şəxsləri qatılacaq.
Görüş çərçivəsində iki ölkə arasında əməkdaşlığın əsas istiqamətləri, o cümlədən enerji, nəqliyyat, kənd təsərrüfatı, texnologiya transferi, ticarət dövriyyəsinin artırılması və qarşılıqlı investisiyaların təşviqi məsələləri müzakirə olunacaq. İclasın yekunlarına dair protokolun imzalanması planlaşdırılır.
Komissiyanın həmsədrləri Azərbaycan və Latviyanın kənd təsərrüfatı nazirləri – Məcnun Məmmədov və Armands Krauzedir.
Qeyd edək ki, Azərbaycan–Latviya Hökumətlərarası Komissiyasının 8-ci iclası 2022-ci ilin may ayında Riqada keçirilib. 9-cu iclasın ötən il mayın 12-də keçirilməsi planlaşdırılsa da, əvvəlcə payız aylarına, daha sonra isə qeyri-müəyyən müddətə təxirə salınmışdı.