Sosial media platforması “X” süni intellekt vasitəsilə yaradılan və xüsusilə silahlı münaqişələrlə bağlı olub istifadəçiləri çaşdıran məzmunlara qarşı yeni qaydalar tətbiq etdiyini açıqlayıb.
BBN.az xəbər verir ki, şirkətin yaydığı məlumata görə, süni intellekt vasitəsilə hazırlanmış video və digər materialları paylaşarkən onların AI ilə yaradıldığını qeyd etməyən kontent yaradıcıları platformanın gəlir paylaşımı proqramından 90 gün müddətinə kənarlaşdırılacaq. Qaydaları pozmaq davam edərsə, həmin istifadəçilər proqramdan birdəfəlik uzaqlaşdırıla bilər.
Şirkətin məhsul bölməsinin rəhbəri Nikita Bier bildirib ki, müharibə dövründə insanların real və etibarlı məlumat əldə etməsi xüsusi əhəmiyyət daşıyır. Onun sözlərinə görə, müasir süni intellekt texnologiyaları ilə insanları asanlıqla çaşdıran görüntülər hazırlamaq mümkündür və bu səbəbdən platforma daha sərt addımlar atmağa qərar verib.
Qeyd edək ki, platformanın gəlir paylaşımı proqramı istifadəçilərə paylaşımlarının baxış sayına əsasən reklam gəlirindən pay qazanmaq imkanı yaradır. Lakin bəzi tənqidçilər hesab edir ki, bu model sensasiyalı və diqqət çəkmək üçün hazırlanmış paylaşımların artmasına səbəb ola bilər.