Bu ilin yanvar–noyabr aylarında Azərbaycanda istehlak qiymətləri ötən ilin müvafiq dövrü ilə müqayisədə 5,7% yüksəlib. Dövlət Statistika Komitəsinin məlumatına görə, qida məhsulları, içkilər və tütün məmulatlarında artım 6,9%, qeyri-qida məhsullarında 2,6%, ödənişli xidmətlərdə isə 6,6% təşkil edib.
Noyabr ayında istehlak qiymətləri 2024-cü ilin oktyabr ayına nisbətən 5,5%, əvvəlki aya nisbətən isə 0,3% artıb. Qida məhsulları üzrə aylıq artım 0,4% olub.
Noyabrda daha çox bahalaşma qarabaşaq yarması, ət konservləri, balıq məhsulları, süd, yumurta, armud, üzüm, qoz-fındıq, şabalıd, bir sıra tərəvəzlər (xiyar, pomidor, şirin bibər, badımcan, soğan, kartof) və çay məhsullarında müşahidə edilib. Ucuzlaşma isə makaron, sitrus meyvələri (limon, portağal, naringi), alma, heyva, nar, xurma, kivi, ağ kələm, göyərti, balqabaq, lobya və bir neçə digər məhsullarda qeydə alınıb.
Noyabr ayında qeyri-qida məhsullarının qiymətləri əvvəlki aya nisbətən 0,2% artıb. Artım şəxsi gigiyena və zərgərlik məmulatlarında, azalma isə bəzi məişət cihazlarında müşahidə olunub.
Əhaliyə göstərilən ödənişli xidmətlər üzrə qiymətlər ay ərzində 0,3% yüksəlib. Artım tibb, mərkəzləşdirilmiş istilik və bərbərxana xidmətlərində, azalma isə beynəlxalq hava nəqliyyatı xidmətlərində qeydə alınıb.