Yaponiya Mərkəzi Bankı pul siyasətinin daha da sərtləşdirilə biləcəyinə dair yeni siqnal verib. Bank sədrinin müavini Ryozo Himino bildirib ki, inflyasiyanın nəzarətdən çıxmasının qarşısını almaq üçün faiz dərəcələrinin vaxtında artırılması vacibdir.
Himinonun açıqlamaları maliyyə bazarlarında Yaponiya Mərkəzi Bankının yaxın aylarda, hətta sentyabr iclasında növbəti faiz artımına gedə biləcəyi ilə bağlı gözləntiləri gücləndirib.
Bank rəsmisinin sözlərinə görə, Yaponiyada baza inflyasiyası 2 faizlik hədəfə yaxınlaşır və qiymət artımının bu səviyyəni keçməsi riski əvvəlki dövrlərlə müqayisədə daha ciddi nəzərə alınmalıdır.
İnflyasiya təzyiqlərinin güclənməsində Yaxın Şərqdəki münaqişə fonunda yanacaq qiymətlərinin yüksəlməsi, qlobal süni intellekt sektorundan qaynaqlanan güclü tələb, eləcə də zəif yen səbəbindən idxal mallarının bahalaşması əsas amillər sırasında göstərilir.
Himino hesab edir ki, faizlərin vaxtında artırılması inflyasiyanın kəskin yüksəlməsinin və bunun ardınca Mərkəzi Bankın daha sərt və sürətli faiz artımlarına məcbur qalmasının qarşısını ala bilər.
Bununla belə, bank rəsmisi sentyabr ayında faiz artımının baş verib-verməyəcəyinə dair konkret mövqe açıqlamayıb. O bildirib ki, qərarlar iqtisadi göstəricilər, qiymət dinamikası və maliyyə şəraiti nəzərə alınmaqla hər bir pul siyasəti iclasında ayrıca müzakirə ediləcək.
Bazarlarda isə sentyabr iclası əsas diqqət mərkəzinə çevrilib. Son dövrdə topdansatış inflyasiyasının sürətlənməsi və Yaponiya Mərkəzi Bankı rəsmilərinin daha sərt açıqlamaları faiz artımı ehtimalını əhəmiyyətli dərəcədə yüksəldib.
Qeyd edək ki, Yaponiya Mərkəzi Bankı iyun ayında əsas faiz dərəcəsini 1 faizə qaldıraraq onu son 31 ilin ən yüksək səviyyəsinə çatdırıb. İyul iclasında faiz dəyişdirilməsə də, bank inflyasiya risklərinin artdığına dair daha sərt mövqe nümayiş etdirib.
İyul ayında Yaponiyada topdansatış qiymətləri illik müqayisədə 7,2 faiz yüksəlib. Bu göstərici istehsal xərclərindəki artımın müəyyən gecikmə ilə istehlak qiymətlərinə də ötürülə biləcəyi ilə bağlı narahatlıqları artırır.
Mövcud siqnallar Yaponiya Mərkəzi Bankının uzun illər davam edən ultra yumşaq pul siyasətindən uzaqlaşma prosesini davam etdirə biləcəyini göstərir. Növbəti faiz artımı yenin məzənnəsi, Yaponiya istiqrazları və ümumilikdə Asiya maliyyə bazarları üçün mühüm təsirə malik ola bilər.