Azərbaycan Mərkəzi Bankı (AMB) maliyyə sektorunda rəqəmsal fırıldaqçılıqla mübarizəni gücləndirmək məqsədilə anti-fraud tənzimləməsi hazırlayır.
Bunu AMB-nin İnformasiya təhlükəsizliyi, kibertəhlükəsizlik və rəqəmsal fırıldaqçılıqla mübarizə departamentinin direktoru Elnur Eyvazlı Bakıda keçirilən “Süni İntellekt Əsrində Maliyyə Kibertəhlükəsizliyinin Gələcəyi” adlı tədbirdə bildirib.
Onun sözlərinə görə, sənədin hazırlanması prosesi təxminən 90 % tamamlanıb və hazırda hüquqi prosedurlar mərhələsindədir.
“Proses başa çatdıqdan sonra sənəd ilkin olaraq layihə şəklində maliyyə sektoru ilə paylaşılacaq. Sektor iştirakçılarının rəyləri toplanacaq və zərurət yaranarsa, sənəd üzərində əlavə təkmilləşdirmələr aparılacaq”, – deyə E.Eyvazlı qeyd edib.
AMB rəsmisi bildirib ki, avtomatlaşdırma, süni intellekt və anti-fraud alətlərindən daha geniş istifadə gündəlik əməliyyatların böyük hissəsinin avtomatlaşdırılmasına imkan yarada bilər. Bu isə insan resurslarının daha çox məlumatların təhlili və hadisələrin araşdırılmasına yönəldilməsinə şərait yaradacaq.
E.Eyvazlı əlavə edib ki, rəqəmsal sektorda istifadəyə verilən bütün xidmətlər mütləq penetrasiya testlərindən (pen-test) keçməlidir.
Onun sözlərinə görə, süni intellektdən pen-test prosesində istifadə müəyyən istiqamətlərdə effektiv olsa da, məntiqi boşluqların aşkarlanması kimi mürəkkəb məsələlərdə ənənəvi yanaşmalar hələ də mühüm rol oynayır.
“OWASP Top 10 kimi geniş yayılmış zəifliklərin aşkarlanması və digər standart yoxlamaların avtomatlaşdırılması mümkündür. Bu yanaşmanı dəstəkləyirəm”, – deyə AMB rəsmisi vurğulayıb.