Azərbaycan Mərkəzi Bankının (AMB) nümayəndə heyəti Qazaxıstanın Almatı şəhərində keçirilən “Mərkəzi bankın etibarlılığı və siyasət effektivliyi üçün kommunikasiya” mövzusunda regional tədbirdə iştirak edib.
Bu barədə AMB məlumat yayıb.
Məlumata görə, Beynəlxalq Valyuta Fondunun (IMF) Qafqaz, Mərkəzi Asiya və Monqolustan üzrə Texniki Yardım Mərkəzi ilə Cənubi Asiya Regional Təlim və Texniki Yardım Mərkəzinin birgə təşkil etdiyi tədbirdə region ölkələrinin mərkəzi bank nümayəndələri, kommunikasiya üzrə ekspertlər və beynəlxalq maliyyə institutlarının təmsilçiləri iştirak ediblər.
Dörd gün davam edən tədbir çərçivəsində mərkəzi bank kommunikasiyasının müasir çağırışları, ictimai etimadın gücləndirilməsi və monetar siyasət üzrə məlumatlılığın artırılmasında kommunikasiya alətlərinin rolu müzakirə olunub.
Tədbirin “Mərkəzi bank kommunikasiyası: ölkə təcrübələri” adlı interaktiv sessiyasında AMB-nin departament direktoru Tural İsmayılov qurumun kommunikasiya sahəsindəki təcrübəsini iştirakçılarla bölüşüb. O, AMB-nin kommunikasiya strategiyası, monetar siyasət qərarlarının ictimaiyyətə çatdırılması və institusional şəffaflığın artırılması istiqamətində həyata keçirilən təşəbbüslər barədə təqdimat edib.