Azərbaycan Dövlət Neft Fondu (ARDNF) Yaponiyanın aparıcı maliyyə qurumları ilə əməkdaşlığını gücləndirir. Fondun İcraçı direktoru İsrafil Məmmədovun rəhbərlik etdiyi nümayəndə heyətinin Yaponiyaya işgüzar səfəri çərçivəsində bir sıra görüşlər keçirilib.
BBN.az xəbər verir ki, səfərin əsas məqsədi tərəfdaş institutlarla əlaqələrin dərinləşdirilməsi, maliyyə bazarlarının öyrənilməsi və yeni investisiya imkanlarının araşdırılması olub.
İlk olaraq Yaponiya Mərkəzi Bankının icraçı direktoru Koji Nakamura ilə görüşdə ölkənin monetar siyasəti, iqtisadi mühiti və qlobal trendlərin təsiri müzakirə olunub. Ardınca Yaponiyanın Beynəlxalq Əməkdaşlıq üzrə Bankının (JBIC) sədri Tadaşi Maeda ilə görüşdə birgə layihələr və gələcək əməkdaşlıq imkanları barədə fikir mübadiləsi aparılıb.
Tokio Fond Birjasında keçirilən görüşlərdə isə institusional islahatlar, şəffaflıq və korporativ idarəetmənin gücləndirilməsi məsələləri diqqət mərkəzində olub. Daha sonra nümayəndə heyəti “Sumitomo Mitsui Trust Group”, “Mizuho Financial Group”, “PGIM” və “PAG Real Assets” rəhbərliyi ilə əməkdaşlığın genişləndirilməsi istiqamətində danışıqlar aparıb.
Səfər çərçivəsində nümayəndə heyəti həmçinin Osaka şəhərində keçiriləcək EXPO 2025 sərgisi üçün inşa olunan Azərbaycan pavilyonunu ziyarət edib. Burada ARDNF-nin strateji baxışı, maliyyə və investisiya təcrübəsi, eləcə də milli sərvətin dayanıqlı inkişafa yönləndirilməsində Fondun rolu barədə təqdimat edilib.
Report