Türk dövlətləri arasında ortaq InsurTech platformasının yaradılması regionun beynəlxalq rəqabət gücünü yüksəldəcək. Bunu Azərbaycan Sığortaçılar Assosiyasının (ASA) sədri Elmar Mirsalayev Bakıda keçirilən “Türk Dövlətləri InsurTech Sammiti 2025”də bildirib.
Onun sözlərinə görə, sığorta sektorunda rəqəmsallaşma təsadüfi deyil və strateji plan əsasında həyata keçirilməlidir:
“Rəqəmsallaşma pərakəndə və təsadüfi deyil, planlı və mərhələli şəkildə aparılmalıdır. Bu proses infrastrukturun modernləşdirilməsi, süni intellektin tətbiqi, müştəri təcrübəsinin rəqəmsallaşdırılması, hüquqi çərçivənin uyğunlaşdırılması və regional əməkdaşlıq üzərində qurulmalıdır.”
E. Mirsalayev əlavə edib ki, bulud əsaslı məlumat sistemləri, API və mikroxidmət arxitekturası, eləcə də məlumat təhlükəsizliyi sığorta sektorunun dayanıqlığı üçün əsas şərtlərdir.