ABŞ fond bazarlarında qeydə alınan eniş və Federal Ehtiyat Sisteminin (FED) faiz qərarı ilə bağlı gözləntilər fonunda Asiya birjalarında ticarət sessiyası qarışıq nəticələrlə başa çatıb.
BBN.az xəbər verir ki, Yaponiyanın Nikkei 225 indeksi 0,2% artaraq 44 995,79 bəndə yüksəlib. Maliyyə Nazirliyinin məlumatına əsasən, avqust ayında ölkənin ABŞ-a ixracı ötən ilin eyni dövrü ilə müqayisədə 13,8% azalıb. Bu, son beş ay ərzində davam edən ardıcıl azalmadır. İxracın azalmasına əsas səbəb kimi avtomobil ixracındakı geriləmə və tətbiq olunan tariflər göstərilir.
Qeyd edək ki, ABŞ bu həftə yapon avtomobilləri və ehtiyat hissələri üzrə tarifləri 27,5%-dən 15%-ə endirib. Açıqlanan statistik göstəricilər avqust ayına aiddir və tariflərin endirilməsindən əvvəlki dövrü əhatə edir. Yaponiyanın ümumi ixrac göstəricisi 0,1% azalıb. Artım əsasən Avropa və Yaxın Şərq istiqamətində qeydə alınıb.
Digər əsas Asiya indeksləri üzrə nəticələr aşağıdakı kimidir:
Avstraliyanın S&P/ASX 200 indeksi 0,7% azalaraq 8 812,80 bənd olub;
Cənubi Koreya birjalarında Kospi indeksi 1,0%-ə yaxın azalaraq 3 415,71 bənd təşkil edib;
Honq Konqun Hang Seng indeksi 0,9% artaraq 26 662,13 bəndə yüksəlib;
Şanxay Kompozit İndeksi isə cüzi – 0,1%-dən az enərək 3 858,74 bənd səviyyəsində qərarlaşıb.
FED-in bu həftə açıqlayacağı faiz qərarı ilə bağlı gözləntilər bazar iştirakçılarının diqqətində qalmaqda davam edir.