Asiya fond bazarlarının əksəriyyəti bazar ertəsi günü ABŞ-da əmək bazarı ilə bağlı açıqlanan zəif hesabatın Wall Street indekslərini rekord həddə yüksəltməsindən sonra müsbət dinamika ilə ticarət olunub. ABŞ-da iyul ayında iş yerlərinin gözlənilmədən azalması və əvvəlki aylara dair göstəricilərin aşağı doğru yenidən nəzərdən keçirilməsi Federal Ehtiyatlar Sisteminin (FED) sentyabr ayında faiz artıracağı ilə bağlı ehtimalları 64-67 faizdən 43-44 faizə qədər gerilədib.
Regional bərpaya xüsusilə Yaponiya və Cənubi Koreya bazarları liderlik edib. Yaponiyanın “Nikkei 225” indeksi təxminən 2 faiz, daha geniş əhatəli “TOPIX” indeksi isə 0,8 faiz yüksəlib. İndekslərin artımına investisiya axınının yenidən yarımkeçirici səhmlərinə yönəlməsi dəstək verib — “Kioxia”, “LARGAN Precision”, “TDK” və “Sony” şirkətlərinin səhmlərində dəyər qazancları qeydə alınıb. Cənubi Koreyanın “KOSPI” indeksi də yarımkeçirici nəhəngləri “SK Hynix” (1,5% artım) və “Samsung Electronics” (0,4% artım) səhmlərinin bərpası fonunda 0,4 faiz yüksəlib.
Materik Çinin fond bazarlarında isə qarışıq dinamika müşahidə olunub. “Shanghai Shenzhen CSI 300” indeksi 0,1 faiz geriləyib, “Shanghai Composite” 0,5 faiz yüksəlib. Çinin texnologiya sektorunda “Alibaba” 2 faizdən çox artdığı halda, “BOE Technology” və “Cambricon Technologies” səhmlərində ucuzlaşma baş verib. Honq-Konqun “Hang Seng” indeksi isə 0,5 faiz dəyər qazanıb.
Avstraliya birjasında “S&P/ASX 200” indeksi 0,5 faiz geriləsə də, litium istehsalçılarının səhmləri və ABŞ əməliyyatlarında restrukturizasiya elan edən “Treasury Wine Estates” şirkəti ümumi tendensiyaya əks olaraq kəskin artım nümayiş etdirib.
Digər tərəfdən, İranın Hörmüz boğazından yeni gəmiçilik yollarının açılması ilə bağlı Omanla sazişə yaxınlaşdığını bildirməsinə baxmayaraq, Vaşinqton qarşısında şərtlər qoyması geosiyasi qeyri-müəyyənliyi qoruyub və neft qiymətlərinin bahalaşmasına səbəb olub. Yanacağın qiymətindəki bu artım inflyasiya risklərini yenidən gündəmə gətirərək çərşənbə günü açıqlanacaq ABŞ-ın iyul ayı üzrə istehlak qiymətləri hesabatına diqqəti daha da artırıb.