Azərbaycan və Macarıstanın mərkəzi bankları arasında əməkdaşlığın genişləndirilməsinə dair Anlaşma Memorandumu imzalanıb.
Bu barədə Azərbaycan Mərkəzi Bankının sədri Taleh Kazımov “X” sosial şəbəkəsindəki paylaşımında məlumat verib.
Onun sözlərinə görə, sənəd Bakıda keçirilən Türk Dövlətləri Təşkilatına üzv ölkələrin mərkəzi (milli) banklarının Şurasının ikinci toplantısı çərçivəsində Macarıstan Mərkəzi Bankının sədri Mixali Varqa ilə imzalanıb.
“Rəhbərlik etdiyimiz qurumlar arasında qarşılıqlı etimada əsaslanan əlaqələrin daha da dərinləşdirilməsi məqsədilə Anlaşma Memorandumu imzaladıq”, – deyə T.Kazımov bildirib.
Memoranduma əsasən, tərəflər monetar siyasət, bank nəzarəti, kapital bazarları, sığorta sektoru, ödəniş sistemləri və maliyyə texnologiyaları sahələrində qarşılıqlı məlumat mübadiləsi aparacaqlar.
Bununla yanaşı, görüşlər, seminarlar, təcrübə mübadilələri, təlim proqramları və işgüzar səfərlər vasitəsilə iki qurum arasında texniki əməkdaşlığın daha da dərinləşdirilməsi nəzərdə tutulur.