Azərbaycanda mənzil təminatı sahəsində maliyyələşmənin əlçatan və dayanıqlı olması istiqamətində son 20 ildə mühüm addımlar atılıb. Bu müddət ərzində ölkədə 58 min ipoteka müqaviləsi bağlanılıb.
Bu fikirləri maliyyə nazirinin birinci müavini və İpoteka və Kredit Zəmanət Fondunun Müşahidə Şurasının üzvü Anar Kərimov Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş “Mənzil Maliyyələşdirilməsi üçün Yeni Razılaşma” adlı tədbirdə səsləndirib.
Onun sözlərinə görə, Azərbaycan ev dayanıqlılığı sistemini formalaşdırmağa nail olub və İpoteka Fondu ölkənin daxili mənzil maliyyələşdirmə sisteminin əsas institusional dayaqlarından birinə çevrilib.
Anar Kərimov qeyd edib ki, ölkədə standart ipoteka kreditləri vətəndaşlar üçün əlçatandır. Bununla yanaşı, həssas sosial qruplar üçün güzəştli sosial ipoteka proqramları da tətbiq olunur.