Qlobal maliyyə bazarlarında qeyri-müəyyənlik pik həddə çatıb. Orta Şərqdə davam edən hərbi-siyasi gərginlik və ABŞ Federal Ehtiyat Sisteminin (FED) faiz dərəcələri ilə bağlı “sərt” mövqeyi dolların mövqeyini möhkəmləndirib, Asiya valyutalarını isə təzyiq altında saxlayıb.
Asiya regionunun əsas valyutaları həftəyə nisbətən stabil, lakin zəif tonla başlayıb. Xüsusilə Yaponiya yenası və Çin yuanı üzərindəki satış təzyiqi davam edir. İnvestorlar riskli aktivlərdən qaçaraq, “təhlükəsiz liman” hesab olunan ABŞ dollarına üz tuturlar.
Hörmüz boğazındakı blokada riskləri və İran-İsrail qarşıdurması fonunda neft qiymətlərinin kəskin artması inflyasiya qorxularını yenidən alovlandırıb. Bu vəziyyət mərkəzi bankların faiz endirimi planlarını təxirə salmasına səbəb ola bilər.
FED-in “Faiz Kabusu” Bitmir
ABŞ-da açıqlanan son məşğulluq və inflyasiya məlumatları iqtisadiyyatın hələ də “isti” olduğunu göstərir. Analitiklər Kevin Uarşın rəhbərliyi altında FED-in faiz dərəcələrini daha uzun müddət yüksək səviyyədə saxlayacağını proqnozlaşdırırlar. Bu isə inkişaf etməkdə olan ölkələrin valyutaları üçün əlavə risk deməkdir. Hazırda :
Dollar İndeksi (DXY): 98 bənd ətrafında möhkəmlənir.
USD/JPY: Müdaxilə qorxusu ilə 158-159 səviyyəsində tərəddüd edir.
Qızıl: Geosiyasi risklərin təsiri ilə rekord səviyyələrə yaxınlaşır.
İnvestorlar indi bütün diqqətini ABŞ-dan gələcək inflyasiya (CPI) hesabatlarına və Orta Şərqdən gələn diplomatik xəbərlərə yönəldib.