Bu ilin iyulun 1-nə vahid xəzinə hesabının milli valyutada olan sərbəst qalığı hesabına yerli banklarda yerləşdirilən depozitlərin həcmi 2,5 milyard manat olub.
BBN.az xəbər verir ki, Hesablama Palatasının yarımillik xülasəsində bildirilir ki, aprel ayından dövlət vəsaitlərinin səmərəli idarə edilməsi üçün ilk dəfə depozit hərracları keçirilib. Bu əməliyyatlar bankların likvidliyini artırıb, Mərkəzi Bank isə izafi likvidliyi aradan qaldırmaq üçün sterilizasiya əməliyyatlarına üstünlük verib.
Sərbəst qalıq vəsaitlərinin idarə edilməsindən daxilolmalar proqnozlaşdırılan 1,4 milyon manata qarşı 23,4 milyon manat təşkil edib. Qanunvericilikdə edilən iyul dəyişikliyi isə bu prosesin hüquqi əsasını formalaşdırıb.
Eyni zamanda, dövlətin borc portfelində qısa və ortamüddətli istiqrazların payı azalaraq uzunmüddətli istiqrazların hesabına dəyişib. Bunun nəticəsində orta ödəniş müddəti 1,47 ildən 2,93 ilə yüksəlib.