Avropa Mərkəzi Bankı (ECB) cümə axşamı keçirilən iclasında əsas faiz dərəcələrini gözlənildiyi kimi dəyişməz saxlayıb.
Depozitlər üzrə faiz dərəcəsi 2 %, həftəlik əsas refinans əməliyyatları üzrə faiz 2,15 %, marjinal kreditləşmə üzrə faiz isə 2,40 % səviyyəsində qalıb. Bank inflyasiyanın orta müddətdə 2 %-lik hədəf ətrafında sabitləşəcəyini bir daha təsdiqləyib.
ECB bildirib ki, iqtisadiyyat çətin qlobal mühitə baxmayaraq davamlılığını qoruyur. Aşağı işsizlik səviyyəsi, özəl sektorun nisbətən sağlam maliyyə vəziyyəti, həmçinin müdafiə və infrastruktur xərclərinin mərhələli artımı müsbət amillər kimi qiymətləndirilib.
Bununla yanaşı, qurum qeyri-müəyyən perspektivlə bağlı xəbərdarlığını təkrarlayıb. Qlobal ticarət siyasətində qeyri-müəyyənlik və artan geosiyasi gərginliklər əsas risk faktorları kimi göstərilib.
Avrozona üzrə inflyasiya ötən ay 1,7 %-ə enib və proqnozlara görə, bir il ərzində ECB-nin 2 %-lik hədəfindən bir qədər aşağı qala bilər. Eyni zamanda, istehlak və investisiyalar hesabına iqtisadi artımın davam etdiyi qeyd olunub.
Hazırda EUR/USD məzənnəsi 1,17 səviyyəsində ticarət edilir.