Avrasiya İnkişaf Bankı (EDB) bərpa olunan enerji, enerji infrastrukturunun modernləşdirilməsi və rəqəmsal layihələr üzrə Azərbaycanla əməkdaşlıq imkanlarını yüksək qiymətləndirir.
Bunu “Report”a müsahibəsində EDB-nin İdarə Heyətinin sədri Nikolay Podquzov bildirib.
Onun sözlərinə görə, bank bərpa olunan enerji layihələri, elektrik şəbəkələrinin yenilənməsi və transsərhəd enerji infrastrukturunun inkişafı istiqamətində təşəbbüslərin işlənib hazırlanması, strukturlaşdırılması və maliyyələşdirilməsinə dəstək verməyə hazırdır.
N.Podquzov qeyd edib ki, Azərbaycan beynəlxalq maliyyə dəstəyi şərti ilə 2050-ci ilə qədər istixana qazı tullantılarının həcmini 1990-cı ilin səviyyəsi ilə müqayisədə 40 % azaltmağı hədəfləyib.
“Beləliklə, maraq qarşılıqlı xarakter daşıyır”, – deyə o vurğulayıb.
EDB rəhbəri əlavə edib ki, bankın qiymətləndirmələrinə əsasən, Azərbaycanda data mərkəzlərinin tikintisi istiqamətində də böyük potensial mövcuddur.
Bununla yanaşı, EDB-nin Rəqəmsal Təşəbbüslər Fondu regional logistika sahəsində ölkələrarası rəqəmsal həllərin tətbiqini dəstəkləyir. Bu çərçivədə e-TIR sistemi və elektron qaimələrin tətbiqi nəticəsində Özbəkistan, Qazaxıstan və Azərbaycan arasında sərhədkeçmə vaxtının dörd günədək azaldılmasının mümkün olduğu bildirilib.