Azərbaycan 2025-ci ildə Birinci Beynəlxalq İnvestisiya Forumunu keçirərək investisiya dialoqu üçün öz beynəlxalq platformasını formalaşdırıb.
BBN.az xəbər verir ki, bunu Azərbaycanın Baş naziri Əli Əsədov V Daşkənd Beynəlxalq İnvestisiya Forumunda çıxışı zamanı bildirib.
Onun sözlərinə görə, Daşkənd Beynəlxalq İnvestisiya Forumu hər il dövlətlərin, biznes dairələrinin və beynəlxalq maliyyə institutlarının daha çox nümayəndəsini bir araya gətirir. Azərbaycan da bu cür təşəbbüsləri beynəlxalq investisiya əməkdaşlığının gücləndirilməsi baxımından mühüm platforma hesab edir.
Baş nazir qeyd edib ki, ötən il keçirilən Birinci Azərbaycan Beynəlxalq İnvestisiya Forumu investorlar, biznes nümayəndələri və beynəlxalq maliyyə institutları tərəfindən böyük maraqla qarşılanıb.
Ə.Əsədov vurğulayıb ki, əldə olunan uğurun davamı olaraq cari ilin sentyabr ayında İkinci Azərbaycan Beynəlxalq İnvestisiya Forumu keçiriləcək. O, forumda iştirak etmək üçün bütün tərəfdaşları Azərbaycana dəvət edib.