İyunun 4-də Enerji Məsələlərini Tənzimləmə Agentliyinin (EMTA) İdarə Heyətinin sədri Samir Axundov Bakı Konqres Mərkəzində Bakı Enerji Həftəsi çərçivəsində 3-4 iyun tarixində keçirilən 30-cu Yubiley Bakı Enerji Forumunun “Elektrik enerjisinin istehsalı və şəbəkə infrastrukturunun inkişafı: gələcəyin enerji təchizatı” mövzusunda plenar müzakirələrində iştirak edib.
Samir Axundov təqdimatla çıxış edərək elektroenergetika sektorunda yaşıl enerjiyə keçid ilə bağlı mövcud çağırışlar, qlobal trendlər və gələcəyin enerji infrastrukturu barədə ətraflı məlumatı forum iştirakçılarının diqqətinə çatdırıb. O, çıxışında ölkəmizin enerji sistemi, o cümlədən qoyuluş gücləri, elektrik enerjisinin ötürülməsi infrastrukturu, enerji ixracı xətləri, qarşıya qoyulmuş hədəflər, həmçinin böyük həcmdə yaşıl enerjinin şəbəkəyə inteqrasiyası ilə əlaqədar batareya enerji saxlanc sistemlərinin tətbiqinin zəruriliyi və bu çərçivədə görülən işlər, eyni zamanda Enerji effektivliyi fondu haqqında danışıb və forum iştirakçılarının suallarını cavablandırıb.
Qeyd edək ki, 2-4 iyun tarixlərində keçirilən Bakı Enerji Həftəsinin tərkib hissəsi olan Bakı Enerji Forumu bu il 30 illik yubileyini qeyd edir. Forum beynəlxalq əlaqələrin möhkəmləndirilməsi, qabaqcıl təcrübələr mübadiləsi və yalnız Azərbaycanın deyil, bütövlükdə regionun enerji sektorunun inkişafına təsir edən sazişlərin imzalanması üçün əsas platformaya çevrilib. Forum enerji sahəsinin liderlərini, biznes və dövlət qurumlarının nümayəndələrini bir araya gətirərək bu sahədə beynəlxalq əməkdaşlığın inkişafına töhfə verir. Bakı Enerji Forumuna Azərbaycan Respublikasının Energetika Nazirliyi dəstək göstərir.