Beynəlxalq texnologiya nəhəngi “Google” (Alphabet Inc) şirkəti irihəcmli satınalma həyata keçirdiyini açıqlayıb. 2004-cü ildə yaradılan kibertəhlükəsizlik üzrə fəaliyyət göstərən “Mandiant” şirkətini tərkibinə qatan “Alphabet” 2012-ci ildə “Motorola Mobility” şirkətini 12.5 milyard dollara satın almasından bu yana ən böyük satınalma tranzaksiyasını həyata keçirib.
“Mandiant” şirkətinə səhmbaşına 23 dollar ödəniş həyata keçirən şirkət ümumilikdə satınalma məbləğini 5.4 milyard dollar həcmində planlaşdırıb.
“Google” tərəfindən verilən açıqlamaya görə, “Mandiant” şirkətinin satınalınmasında əsas məqsəd kimi, davam edən Rusiya-Ukrayna münaqişələri fonunda kibertəhlükəsizlik tədbirlərini gücləndirmək və bulud texnologiyasından istifadəni təkmilləşdirmək göstərilib.
Qeyd edək ki, Virciniya mərkəzli “Mandiant” şirkəti hazırda kibertəhlükəsizlik üzrə lider şirkətlərdəndir və ümumi bazar kapitalizasiyası 5.15 milyard dollar həcmində dəyərləndirilir.