İngiltərə Mərkəzi Bankının (Bank of England) rəhbəri Endryu Beyli (Andrew Bailey) G20 ölkələrinin maliyyə nazirlərini süni intellektin qlobal iqtisadi durğunluğa səbəb ola biləcəyi barədə xəbərdar edib.
Beyli avqustun 31-də G20 ölkələrinin maliyyə nazirlərinə ünvanladığı açıq məktubda süni intellektin maliyyə sistemi üçün ciddi kibertəhlükəsizlik riski yarada biləcəyini bildirib.
Onun sözlərinə görə, şirkətlər eyni vaxtda bir neçə quruma təsir göstərə biləcək genişmiqyaslı təhlükəsizlik pozuntularına hazır olmalıdırlar.
Beyli süni intellekt sektorunda baş verə biləcək kəskin geriləmənin dünya üzrə maliyyə bazarlarında ciddi korreksiyaya səbəb ola biləcəyini qeyd edib. O, yüksək səviyyəli səhm qiymətləri, investorların artan borclanması və kapitalın az sayda iri texnologiya şirkətində cəmləşməsinin mümkün bazar düzəlişlərinin təsirini daha da gücləndirə biləcəyini vurğulayıb.
Maliyyə Sabitliyi Şurasının (FSB) sədri kimi çıxış edən Beyli maliyyə təhlükəsizliyinə cavabdeh qurumları süni intellekt modellərinin qlobal miqyasda təhlükəsiz və məsuliyyətli şəkildə hazırlanması və tətbiqini təmin etmək üçün müvafiq tədbirlər görməyə çağırıb.
Qeyd edək ki, avqustun əvvəlində “Google”, “Microsoft”, “Anthropic” və “OpenAI” də daxil olmaqla 100 şirkətdən ibarət qrup ölkələri süni intellektin kibermüdafiə sistemlərini üstələyə biləcək səviyyəyə çatmasından əvvəl mövcud müdafiə mexanizmlərini gücləndirməyə çağırıb.
Beylinin xəbərdarlığı süni intellekt şirkətlərinin bankların və maliyyə mərkəzlərinin təhlükəsizlik sistemlərini keçə biləcək modellər hazırlaması ilə bağlı narahatlıqların artdığı bir dövrə təsadüf edir.
Bəzi süni intellekt agentlərinin təhlükəsizlik məhdudiyyətlərini aşmaq məqsədilə real insanları təqlid etməsi də sektor üzrə risklərin artmasına dair narahatlıqları gücləndirib.
İngiltərə hökuməti isə ölkənin “suveren süni intellekt” imkanlarının inkişaf etdirilməsini prioritet istiqamətlərdən biri kimi müəyyənləşdirib. Bu çərçivədə yerli süni intellekt texnologiyalarının inkişaf etdirilməsi və ölkənin xarici xidmətlərdən asılılığının azaldılması hədəflənir.
Beylinin rəhbərlik etdiyi FSB qlobal maliyyə sisteminin sabitliyinə nəzarət edən beynəlxalq qurumdur. Təşkilata ABŞ, İngiltərə, Fransa, Almaniya, Kanada, Yaponiya, Avstraliya, Çin və Səudiyyə Ərəbistanı da daxil olmaqla bir sıra ölkələrin maliyyə və tənzimləyici qurumlarının nümayəndələri daxildir.