İqtisadiyyat nazirinin müavini Səməd Bəşirli Beynəlxalq Valyuta Fondunun (BVF) Azərbaycan üzrə missiya rəhbəri Anna Bordon ilə görüşüb.
Bu barədə İqtisadiyyat Nazirliyi məlumat yayıb.
Görüş zamanı cari və ortamüddətli dövr üzrə iqtisadi proqnozlar, struktur islahatları və Azərbaycan iqtisadiyyatının şaxələndirilməsi istiqamətində həyata keçirilən tədbirlər müzakirə olunub. Həmçinin İqtisadiyyat Nazirliyinin bu sahədə fəaliyyəti, vergi siyasəti və vergi inzibatçılığı üzrə aparılan islahatlarla bağlı fikir mübadiləsi aparılıb.
Sahibkarlığın inkişafı məqsədilə dövlət dəstəyi mexanizmlərinin genişləndirilməsi və yeni alətlərin tətbiqi, eləcə də qeyri-neft-qaz sektorunda investisiya siyasətləri barədə məlumat verilib. Beynəlxalq maliyyə qurumları ilə tərəfdaşlıq imkanları da diqqət mərkəzində olub.
Tərəflər qarşılıqlı maraq doğuran digər məsələlər ətrafında fikir mübadiləsi aparıblar.