ABŞ istiqraz bazarında artan gərginlik fonunda investorların diqqəti Federal Ehtiyat Sisteminin (FED) sədri Kevin Uorşun (Kevin Warsh) Cekson-Houl iqtisadi simpoziumunda edəcəyi ilk böyük çıxışa yönəlib.
BBN.az xəbər verir ki, bazar iştirakçıları Uorşun çıxışından ABŞ-da faiz dərəcələrinin gələcək istiqaməti, inflyasiya ilə mübarizə və son həftələrdə istiqraz gəlirliliklərində müşahidə olunan yüksəlişlə bağlı daha aydın mesajlar gözləyirlər.
ABŞ-da inflyasiyanın FED-in 2%-lik hədəfindən beş ildən artıqdır yüksək qalması Mərkəzi Bank üzərində təzyiqi artırır. FED daxilində də faizlərin artırılmasının gecikdirilməsinin gələcəkdə daha sərt addımlara ehtiyac yarada biləcəyi ilə bağlı narahatlıqlar güclənib.
Ekspertlər hesab edirlər ki, mövcud şəraitdə Uorşun yalnız uzunmüddətli monetar siyasət prinsiplərindən deyil, yaxın aylarda faiz dərəcələri ilə bağlı FED-in hansı addımları ata biləcəyindən danışması bazarlar üçün xüsusi əhəmiyyət daşıyır.
Gərginliyin əsas səbəblərindən biri ABŞ və digər böyük iqtisadiyyatlarda uzunmüddətli istiqraz gəlirliliklərinin yüksəlməsidir. Artan dövlət borcları, beynəlxalq ticarət və təchizat zəncirlərində parçalanma, əhalinin yaşlanmasının yaratdığı xərclər və süni intellekt sahəsinə böyük həcmdə investisiyalar qlobal kapital uğrunda rəqabəti gücləndirir. Reuters-in qeyd etdiyi kimi, əvvəlki illərin “qlobal əmanət bolluğu” mühiti getdikcə “qlobal əmanət sıxlığı” ilə əvəzlənir.
Vəziyyəti mürəkkəbləşdirən digər amil ABŞ Maliyyə Nazirliyinin istiqraz bazarına müdaxiləsidir. Maliyyə naziri Skott Bessentin (Scott Bessent) uzunmüddətli istiqraz bazarındakı son addımları FED-in pul siyasəti ilə hökumətin borclanma strategiyası arasındakı əlaqəni investorların diqqət mərkəzinə gətirib.
Eyni zamanda, son bir ayda dolların əsas valyutalar qarşısında zəifləməsi ABŞ-da əlavə inflyasiya təzyiqi yarada biləcək amillərdən biri kimi qiymətləndirilir.
Uorşun çıxışının başqa bir mühüm tərəfi FED-in müstəqilliyi ilə bağlıdır. ABŞ Senatının Bank Komitəsindəki demokratlar Uorşdan Prezident Donald Trampla kommunikasiyalarına dair məlumat istəyiblər. Bu fonda investorlar FED rəhbərinin monetar siyasətlə bağlı qərarlarını siyasi təsirlərdən nə dərəcədə müstəqil formalaşdırdığına da diqqət yetirirlər.
Kevin Uorşun cümə günü ABŞ-ın Vayominq ştatında keçirilən Cekson-Houl simpoziumunda əsas çıxışını etməsi planlaşdırılır. Çıxışın ABŞ istiqrazlarının gəlirliliyinə, dolların məzənnəsinə, qızıl və səhm bazarlarına təsir göstərə biləcək əsas hadisələrdən biri olacağı gözlənilir.