Kriptovalyuta bazarları həftənin ilk günündə ciddi təzyiq altında qalaraq eniş tendensiyasını davam etdirib. Əsas rəqəmsal aktiv olan Bitkoin (BTC) qiymətlərdəki geriləmə ilə 63,000 dollar həddindən aşağı düşərək təxminən 62,800 dollar ətrafında ticarət olunub. Maraqlıdır ki, bu dəfə qlobal miqyasda baş verən müsbət makroiqtisadi xəbərlər — o cümlədən ABŞ-İran münasibətlərində mümkün danışıqlar və neft qiymətlərinin ucuzlaşması belə kriptovalyuta bazarını xilas edə bilməyib.
Bazarın bu cür neqativ reaksiyasına əsas səbəb məşhur aparat (cold) pulqabı markası olan “Coldcard” sistemində başverən irimiqyaslı təhlükəsizlik boşluğu və kiberhücum olub. Adətən ən təhlükəsiz saxlanc vasitəsi hesab edilən soyuq pulqabıların sındırılması və hakerlərin minlərlə ünvandan milyonlarla dollar dəyərində Bitkoin oğurlaması investorlar arasında böyük təşviş yaradıb. Təhlil şirkətlərinin məlumatına görə, hücumlar nəticəsində on milyonlarla dollarlıq vəsait oğurlanıb ki, bu da rəqəmsal aktivlərin təhlükəsizliyinə olan etimadı sarsıdıb.
Bununla yanaşı, səhmdar cəmiyyətlərin və sektorun nəhəng oyunçularının (məsələn, Coinbase və Strategy Inc.) gözləniləndən zəif maliyyə hesabatları, həmçinin fond bazarlarından kapital axını kriptovalyuta sektorundakı mövcud gərginliyi daha da dərinləşdirib. Ekspertlər bildirirlər ki, bazarın əsas diqqəti hazırda texniki təhlükəsizlik məsələlərinə yönəlib və treyderlər qısamüddətli dövrdə olduqca ehtiyatlı davranmağa məcbur qalırlar.