BBN.az xəbər verir ki, Azərbaycanda nağdsız ödənişlərin həcmi artmaqda davam edir. Mərkəzi Bankın sədr müavini Vüsal Xəlilovun sözlərinə görə, ölkədə ödəniş kartları vasitəsilə həyata keçirilən əməliyyatlarda nağdsız ödənişlərin payı artıq 70 faizə yaxınlaşıb.
Onun sözlərinə görə, son illərdə rəqəmsal ödəniş infrastrukturunun genişləndirilməsi, müasir ödəniş həllərinin tətbiqi və elektron maliyyə xidmətlərinin inkişafı bu göstəricinin yüksəlməsində əsas rol oynayıb.
V.Xəlilov bildirib ki, nağdsız ödənişlərin artması həm maliyyə xidmətlərinin əlçatanlığını genişləndirir, həm də iqtisadiyyatın şəffaflığının güclənməsinə və rəqəmsal transformasiyanın sürətlənməsinə töhfə verir.
Mərkəzi Bank rəqəmsal ödəniş ekosisteminin inkişafı, innovativ maliyyə texnologiyalarının tətbiqi və təhlükəsiz ödəniş mühitinin formalaşdırılması istiqamətində fəaliyyətini davam etdirir.
Qeyd edək ki, son illərdə Azərbaycanda nağdsız hesablaşmaların həcmi davamlı şəkildə artaraq pərakəndə ödənişlərdə rəqəmsal alətlərdən istifadənin genişləndiyini göstərir.