Maliyyə institutlarının potensialının gücləndirilməsi və yeni təşəbbüslərin tətbiqi imkanları Mərkəzi Bankda keçirilən görüşdə müzakirə edilib. Toplantı İqtisadiyyat Nazirliyi ilə birgə kommersiya banklarının nümayəndələri üçün “2024–2026-cı illərdə maliyyə sektorunun inkişaf strategiyası”nın icrası çərçivəsində təşkil olunan təlim xarakterli ilkin görüş olub.
Görüşdə müzakirə edilən əsas mövzular:
-
dövlət-özəl tərəfdaşlığı layihələrinin rolu;
-
maliyyə institutlarının potensialının gücləndirilməsi;
-
maliyyə sektorunda yeni təşəbbüslərin tətbiqi imkanları.
İqtisadiyyat Nazirliyinin nümayəndələri tərəfindən dövlət-özəl tərəfdaşlığının əsas xüsusiyyətləri, tətbiq modelləri, aidiyyəti qanunvericilik layihələri və onların reallaşdırılması imkanları barədə təqdimatlar edilib. Həmçinin banklar ilə dövlət strukturları arasında əməkdaşlığın təşviqi məsələləri iştirakçıların diqqətinə çatdırılıb.
Məlumata görə, bu istiqamətdə növbəti mərhələlərdə görüşlərin beynəlxalq maliyyə institutlarının da iştirakı ilə keçirilməsi planlaşdırılır.