ABŞ-ın texnologiya nəhənglərindən biri olan Microsoft, OpenAI-nin fransız rəqibi Mistral AI ilə yeni ortaqlıq qurduqlarını açıqladı.
BBN.az bu barədə Bloomberg Türkiyəyə istinadən xəbər verir.
Şirkətdən verilən açıqlamada yeni ortaqlığın Mistral AI-yə Azure-un ən müasir süni intellekt infrastrukturuna daxil olmaq imkanı verəcəyi, yeni nəsil böyük dil modellərinin inkişafı və tətbiqini sürətləndirəcəyi bildirilib.
Açıqlamada həmçinin yeni ortaqlıq çərçivəsində Mistral AI-nin süni intellekt modellərinin Azure bulud hesablama platforması vasitəsilə istifadəyə veriləcəyi əlavə edilib.
Bundan əlavə, verilən açıqlamada Microsoft-un qlobal süni intellekt innovasiyalarını və böyüməsini dəstəkləməkdə qərarlı olduğu vurğulanıb və Mistral AI ilə tərəfdaşlığın etibarlı və təhlükəsiz süni intellekt sistemləri və məhsulları yaratmaq üçün ortaq öhdəlik əsasında qurulduğu qeyd edilib.