Azərbaycan, Qazaxıstan və Gürcüstanın kommersiya banklarının Orta Dəhlizin maliyyələşdirilməsində birbaşa iştirakı məhdud olacaq. Bununla belə, onlar layihə nəticəsində iqtisadi fəallığın artımından əhəmiyyətli fayda əldə edəcəklər.
“Moody’s”in hesabatına görə, əsas maliyyələşdirmə dövlətlər, dövlət müəssisələri, beynəlxalq maliyyə institutları və özəl investorlar hesabına həyata keçiriləcək. Bankların isə əsasən logistika, sindikatlaşdırılmış kreditlər və əlaqəli infrastrukturun maliyyələşdirilməsində dolayı iştirakı gözlənilir.
Agentlik bildirir ki, Azərbaycan banklarının resurslarının təxminən 90 %-i, Qazaxıstan banklarının isə 80 %-i qısamüddətlidir ki, bu da uzunmüddətli kredit imkanlarını məhdudlaşdırır. Gürcüstan banklarında isə beynəlxalq maliyyə institutlarının dəstəyi ilə daha çox uzunmüddətli resurs mövcuddur.
Proqnozlara əsasən, Orta Dəhlizin inkişafı region ölkələrində korporativ və KOB seqmentlərinin güclənməsinə, pərakəndə kreditləşmənin artmasına və bank sistemlərinin dayanıqlığının yüksəlməsinə gətirib çıxaracaq.