Qiymətli metallarda canlanma: Qlobal maliyyə bazarlarında ABŞ dollarının ardıcıl dəyər itirməsi qızılın qiymətini yenidən yuxarı trendə daşıyıb. Hazırda investorların diqqəti ABŞ və İran arasında davam edən diplomatik danışıqlardadır ki, bu da birbaşa olaraq valyuta və əmtəə bazarlarına təsir edir. Hazırda spot qızılın dəyəri 0.6% artaraq bir unsiya üçün 4,834.02 dollar səviyyəsinə çatıb. Qızıl fyuçersləri isə 0.7% yüksəlişlə 4,850 dollar həddini sınağa çəkir. Artımın əsas səbəblərinə gəldikdə isə qeyd edək ki, Dollar indeksinin (DXY) son 6 həftənin minimumuna düşməsi, xarici valyuta ilə ticarət edən investorlar üçün qızılı daha cəlbedici edib. İranla danışıqların gedişatına dair gözləntilər də bazarda ehtiyatlılıq yaradır. İnvestorlar hər hansı bir sürprizə qarşı aktivlərini “təhlükəsiz liman” sayılan qızılda qorumağa çalışırlar. ABŞ-da istehsalçı qiymətlərinin (PPI) aşağı düşməsi Federal Ehtiyat Sisteminin (FED) faiz artımı siyasətində yumşalmaya gedəcəyi ehtimalını artırıb ki, bu da qızılın qiymətini dəstəkləyən ən böyük faktorlardan biridir. Analitiklər hesab edir ki, əgər dollar indeksi 98 bənddən aşağıda qalmağa davam edərsə, qızılın qiyməti qısa müddətdə 4,900 dollar psixoloji həddinə qədər yüksələ bilər.