Pekində keçirilən yüksək səviyyəli sammitdən sonra Donald Tramp “Fox News” telekanalına verdiyi eksklüziv müsahibədə dünyanı silkələyəcək açıqlamalar verib. Şi Cinpinlə keçirdiyi ikitərəfli görüşün detallarını paylaşan ABŞ prezidenti, Çinin Amerika neftinə olan “doymaq bilməyən iştahını” cilovlaya bilmədiyini və böyük bir enerji sövdələşməsinə “hə” dediyini bəyan edib.
Trampın sözlərinə görə, Çin tərəfi artıq ABŞ-dan külli miqdarda neft və enerji resursları almağa razılaşıb. “Onlar gəmilərini Texasa, Luizianaya və Alyaskaya göndərməyə başlayacaqlar,” deyən Tramp, bu razılaşmanın Amerika iqtisadiyyatı və enerji sektoru üçün yeni bir dövrün başlanğıcı olduğunu vurğulayıb. Liderlər təkcə neftlə kifayətlənməyib; sövdələşmə çərçivəsində Çinin ABŞ-dan 200 ədəd “Boeing” təyyarəsi alacağı və kənd təsərrüfatı məhsullarının idxalını kəskin artıracağı da bildirilir.
Bu enerji həmləsi, xüsusilə Yaxın Şərqdə gərginliyin artdığı və Hörmüz boğazında daşımaların risk altına düşdüyü bir vaxtda qlobal bazarlarda kartların yenidən paylanması kimi qiymətləndirilir. Tramp həmçinin qeyd edib ki, Şi Cinpin İran məsələsində də kömək etməyə hazır olduğunu və Tehranın nüvə silahına sahib olmasını istəmədiyini təsdiqləyib. Görünən odur ki, Trampın “ticarət diplomatiyası” Pekin səfərində öz bəhrəsini verməyə başlayıb.