Türk İnvestisiya Fondu (TIF) institusional inkişaf mərhələsini yekunlaşdırıb və yaxın vaxtlarda maliyyə əməliyyatlarının icrasına başlamağa hazırlaşır.
Bu barədə Fondun prezidenti Bağdad Amreyev məlumat verib. Onun sözlərinə görə, TIF beynəlxalq tərəfdaşlıqlar və aparıcı qlobal maliyyə institutları ilə əməkdaşlıq vasitəsilə kapitallaşmanı genişləndirməyi planlaşdırır.
B.Amreyev bildirib ki, Fond Türk dünyasının qlobal tərəfdaşlarla iqtisadi əlaqələrinin möhkəmləndirilməsi üçün mühüm platforma olacaq və fəaliyyətinin üzv dövlətlər arasında iqtisadi əməkdaşlığın dərinləşməsinə əhəmiyyətli töhfə verəcəyinə əmindir.
Qeyd edək ki, Türk İnvestisiya Fondu 2024-cü il mayın 18-də Türkiyə, Azərbaycan, Qazaxıstan, Qırğızıstan və Özbəkistan tərəfindən təsis edilib. Fondun əsas məqsədi türkdilli ölkələrdə dövlət və özəl layihələrin dəstəklənməsi, infrastruktur, bərpa olunan enerji, kənd təsərrüfatı və turizm sahələrinə investisiyaların cəlb edilməsi və iqtisadi artıma dəstək verməkdir.
Macarıstanın Fondun iştirakçısı kimi qoşulmasından sonra nizamnamə kapitalı 100 milyon ABŞ dolları artırılaraq 600 milyon ABŞ dollarına çatdırılıb.