2023-cü ildə texnologiya sənayesində 244 mindən çox iş yeri itirilib

2022-ci ili 164 min 411 nəfər işçi itkisi ilə bağlayan qlobal texnologiya sənayesi, 2023-cü ilin əvvəlindən bu yana isə 244 min 342 nəfər işçi itkisi yaşayıb.

BBN.az Layoffs.fyi tərəfindən tərtib edilən məlumatlara istinadən xəbər verir ki, 2023-cü ildə 1069 texnologiya şirkəti 244 min 342 işçini ixtisar edib, işçilərin ixtisarına səbəb olan əsas amillər makroiqtisadi mühitə görə xərclərin azaldılması planları, pandemiya zamanı texniki heyətin tələbata görə artırılması və süni intellekt kimi yeni texnologiyalar üçün restrukturizasiya planları olub. Davam edən tədarük zənciri problemləri və inflyasiya, həm biznesə, həm də istehlakçı xərclərinə təsir edib və tənəzzül qorxusu yaradıb.

Qeyd edək ki, Meta, Amazon, LinkedIn, Google, Salesforce, IBM, Microsoft, PayPal, Intel, eBay, Zoom kimi texnologiya nəhəngləri də daxil olmaqla, bir çox şirkət minlərlə işçi ilə yollarını ayırıblar.