Azərbaycanın bank sektorunun aktivləri 2025-ci il dekabrın 1-nə 58 milyard 748,6 milyon manat təşkil edib.
Bu göstərici ötən ilin müvafiq dövrü ilə müqayisədə 17,1% artım deməkdir.
Bankların aktivlərinin 27 milyard 919,7 milyon manatını müştərilərə verilmiş xalis kreditlər təşkil edib. Son 1 ildə kredit portfeli 8,4% böyüsə də, kreditlərin aktivlərdəki payı 51,4%-dən 47,5%-ə enib.
Hesabat dövründə bank sektorunun öhdəlikləri 18% artaraq 51 milyard 517,4 milyon manata çatıb. Depozit portfeli isə 5,7% artaraq 37 milyard 202 milyon manat təşkil edib. Depozitlərin 15 milyard 847,7 milyon manatı fiziki, 21 milyard 354,3 milyon manatı isə hüquqi şəxslərin payına düşür. Əhalinin banklardakı vəsaitləri il ərzində 14,3%, şirkətlərin vəsaitləri isə 0,1% artıb.
Son 1 ildə bankların Azərbaycan Mərkəzi Bankı qarşısındakı öhdəliyi 7 dəfə azalaraq 0,5 milyon manata düşüb.
Sektorun balans kapitalı isə 11,2% artaraq 7 milyard 231,1 milyon manat olub.
