Macarıstanın Milli İqtisadiyyat Nazirliyinin Avropa İttifaqının Məşğulluq və ESF Proqramları Departamentinin baş layihə məsləhətçisi Tibor Bors Borbeli-Pecze DOST Agentliyində olub.
Qonaq əvvəlcə 1 saylı Bakı DOST Mərkəzində əhaliyə göstərilən xidmətlərlə tanış olub. DOST mərkəzlərinin fəaliyyəti və iş prinsipi ona izah olunub.
Daha sonra keçirilən görüşdə DOST Agentliyinin İdarə Heyəti sədrinin müavini Seymur Alıyev DOST konsepsiyası barədə qonağa məlumat verib. Bildirilib ki, DOST mərkəzlərində əmək və məşğulluq, sosial təminat, ünvanlı dövlət sosial yardımı, əlillik və reabilitasiya, pensiya, sosial sığorta və s. üzrə 160 növ xidmət göstərilir. DOST konsepsiyasının dünyanın qabaqcıl təcrübələri sırasına daxil edildiyi, beynəlxalq müstəvidə uğurlar qazandığı qonağın diqqətinə çatdırılıb.
Görüşdə əmək və məşğulluq, eləcə də Əmək və Əhalinin Sosial Müdafiəsi Nazirliyinin digər xidmətləri, DOST Agentliyinin könüllülük təcrübəsi, DOST İndeks və başqa mövzularda müzakirələr aparılıb.
