Bu ilin yanvar–avqust aylarında Azərbaycanda əsas kapitala yönəldilən investisiyaların həcmi 11 milyard 374,5 milyon manat təşkil edib. Bu göstərici ötən ilin eyni dövrü ilə müqayisədə 0,2 % azalıb.
BBN.az Dövlət Statistika Komitəsinin məlumatına istinadən xəbər verir ki, neft-qaz sektoruna yatırımlar 16,6 % azalıb, qeyri-neft-qaz sektoruna isə əksinə 8 % artım qeydə alınıb.
İstifadə olunan investisiyaların bölgüsü belə olub:
-
5 milyard 800,2 milyon manat (51 %) — məhsul istehsalı sahələri
-
3 milyard 819,9 milyon manat (33,6 %) — xidmət sahələri
-
1 milyard 754,4 milyon manat (15,4 %) — yaşayış evlərinin tikintisi
Bundan əlavə, əsas kapitala yönəldilmiş investisiyaların 8 milyard 752,8 milyon manatı (77 %) daxili investisiyaların payına düşüb. Yatırımların əsas hissəsi — 8 milyard 985,9 milyon manat (79 %) isə tikinti-quraşdırma işlərinə sərf olunub.
