Bu ilin yanvar–sentyabr aylarında Azərbaycanın kapital və maliyyənin hərəkəti hesabı üzrə mənfi saldo 4 milyard 63,4 milyon ABŞ dolları təşkil edib. Bu göstərici ölkədən kapital və maliyyə axınının həcmini əks etdirir.
BBN.az xəbər verir ki, bu barədə Azərbaycan Mərkəzi Bankında (AMB) keçirilən mətbuat konfransında qurumun Statistika departamentinin direktoru Samir Nəsirov məlumat verib.
Onun sözlərinə görə, 9 ay ərzində Azərbaycanın xalis maliyyə aktivləri 4 milyard 479,3 milyon ABŞ dolları, xalis maliyyə öhdəlikləri isə 415,9 milyon ABŞ dolları artıb.
AMB rəsmisi bildirib ki, hesabat dövründə birbaşa xarici investisiyalar üzrə xalis kəsir təxminən 1,2 milyard ABŞ dolları olub. Bu müddətdə Azərbaycan iqtisadiyyatına 4,7 milyard ABŞ dolları həcmində birbaşa xarici investisiya cəlb edilsə də, ölkədən 5 milyard ABŞ dolları məbləğində kapital repatriasiyası həyata keçirilib.
