ABA-nın üzv təşkilatları üçün Səudiyyə İxrac Proqramının təqdimatı keçirilib

11 fevral 2020-ci il tarixində “Amrahbank” ASC-nin baş ofisində Səudiyyə İnkişaf Fondunun (SFD) nümayəndələri ilə Azərbaycan Banklar Assosiasiyasının (ABA) üzv təşkilatları arasında görüş keçirilib. Görüşdə Səudiyyə İnkişaf Fondunun eksport üzrə maliyyə direktoru cənab Ali Algarni, mühasibatlıq və monitorinq departamentinin sədri cənab Mohammed Al-Tombkti, marketinq və informasiya departamentinin mütəxəssisi cənab Navaf Al-Ojruş, ABA-ya üzv olan bankların nümayəndələri, Azərbaycan Respublikasının Kiçik və Orta Biznesin İnkişafı Agentliyinin (KOB) nümayəndələri, o cümlədən bir sıra iş adamları iştirak ediblər.

Görüş çərçivəsində iştirakçılara Fondun Səudiyyə İxrac Proqramı (SİP) barədə təqdimat keçirilib, proqramın müraciət və icra prosedurları barədə ətraflı məlumat verilib.

Qeyd edək ki, 10 fevral tarixində SFD ilə “Amrahbank” ASC arasında rəsmi əməkdaşlıq barəsində razılıq əldə olunub. Razılığa əsasən Bankın müştəriləri Səudiyyə Ərəbistanından göndərilən məhsul və xidmət növlərinin, eləcə də Azərbaycanda real sektorun maliyyələşdirilməsində birgə əməkdaşlıq ediləcəkdir. Bununla yanaşı, görüş əsnasında SFD ilə digər banklar arasında B2B görüşlər keçirilib.

© Materiallardan istifadə edərkən hiperlinklə istinad olunmalıdır