Azərbaycan Banklar Assosiasiyasının (ABA) nümayəndə heyəti Almaniyanın Frankfurt şəhərində yerləşən The Bank of New York Mellon (BNY Mellon) bankında Almaniya səfəri çərçivəsində növbəti görüşünü keçirib.
Görüş zamanı BNY Mellon-un Almaniyadakı fəaliyyəti, qlobal maliyyə bazarlarındakı mövqeyi və bankın beynəlxalq tərəfdaşlarla əməkdaşlıq istiqamətləri barədə məlumat təqdim olunub.
Tədbir çərçivəsində süni intellekt texnologiyalarının bank sektorunda tətbiqi, rəqəmsal ödəniş həlləri və maliyyə innovasiyalarının inkişafı kimi mövzularda təqdimatlar dinlənilib. BNY Mellon nümayəndələri süni intellektin əməliyyat proseslərinə inteqrasiyası və rəqəmsal ödəniş sistemlərinin inkişaf istiqamətində həyata keçirilən layihələr haqqında ətraflı məlumat veriblər.
Görüşdə tərəflər beynəlxalq maliyyə sektorunda trendlər, rəqəmsal transformasiyanın təsirləri və gələcək əməkdaşlıq imkanları barədə fikir mübadiləsi aparıblar.
