ABŞ Maliyyə Nazirliyi avqust ayı üzrə büdcə balansı göstəricilərini açıqlayıb.
BBN.az xəbər verir ki, ötən ay federal hökumətin büdcə kəsiri əvvəlki ilin avqustu ilə müqayisədə 9% azalaraq 380 milyard dollar təşkil edib. Halbuki bazar gözləntiləri 305,7 milyard dollarlıq kəsir idi.
Məlumata görə, avqustda dövlət gəlirləri illik 12% artaraq 344 milyard dollara yüksəlib, xərclər isə dəyişməyərək 689 milyard dollar səviyyəsində qalıb. Maraqlı məqam odur ki, ABŞ Prezidenti Donald Trampın tarif siyasəti nəticəsində gömrük rüsumlarından daxilolmalar ötən ilin eyni ayı ilə müqayisədə 296% artaraq 30 milyard dollara çatıb.
Ümumilikdə, 2025-ci maliyyə ilinin 11 ayında federal büdcə kəsiri 1 trilyon 973 milyard dollar olub. Bu, ötən ilin eyni dövrü ilə müqayisədə 4% çoxdur. 2024-cü ilin eyni dövründə bu göstərici 1 trilyon 897 milyard dollar idi.
Eyni zamanda, sözügedən dövrdə gəlirlər 7% artaraq 4,7 trilyon dollar, xərclər isə 6% artaraq 6,7 trilyon dollar səviyyəsinə çatıb.
