Asiya İnkişaf Bankı (AİB) Azərbaycanın tədiyyə balansının cari əməliyyatlar hesabı üzrə proqnozlarını açıqlayıb.
BBN.az xəbər verir ki, Bankın “Asiyanın İnkişaf Perspektivləri” adlı aprel icmalına əsasən, 2026-cı ildə cari əməliyyatlar hesabının profisitinin ÜDM-in 5,3%-i səviyyəsində olacağı gözlənilir. Bu artım əsasən neft qiymətlərinin yüksəlməsi ilə izah olunur.
Hesabata görə, 2027-ci ildə isə ixrac gəlirlərinin azalması fonunda profisitin ÜDM-in 3,5%-dək enəcəyi proqnozlaşdırılır.
Qeyd edək ki, 2025-ci ilin yekunlarına əsasən, Azərbaycanın cari əməliyyatlar hesabı 3,475 milyard ABŞ dolları profisitlə bağlanıb ki, bu da ÜDM-in 4,6%-nə bərabərdir.
Eyni zamanda, beynəlxalq maliyyə institutlarının proqnozlarında fərqli yanaşmalar müşahidə olunur. Belə ki, ING Group Azərbaycanın cari hesab profisitini 2026-cı ildə ÜDM-in 6,5%-i, 2027-ci ildə isə 1,7%-i səviyyəsində qiymətləndirir.
Bundan əlavə, Moody’s beynəlxalq reytinq agentliyi cari hesabın profisitinin 2026-cı ildə ÜDM-in 5%-i, 2027-ci ildə isə 5,2%-i olacağını proqnozlaşdırır.