Azərbaycan Respublikasının Mərkəzi Bankı maliyyə xidmətləri istehlakçılarının və investorların hüquqlarının müdafiəsi, eyni zamanda onların maliyyə savadlılığının artırılması istiqamətində təşkil etdiyi tədbirlərin davamı olaraq Əlil Təşkilatları İttifaqına üzv təşkilatların 20 nümayəndəsi üçün “Maliyyə savadlılığı” üzrə təlim proqramı təşkil etmişdir.
Proqrama “Rəqəmsal ödənişlərdən istifadənin üstünlükləri”, “Milli pul nişanları və onların mühafizə elementləri”, “İstehlak kreditinin xüsusiyyətləri”, “Vətəndaşlar üçün sığorta”, “Əmanətlərin sığortalanması” və “Neyromarketinq” mövzuları daxil edilmişdir.
Proqram iştirakçılarına Mərkəzi Bankın maliyyə savadlılığının artırılması istiqamətində hazırlanmış elektron resursları (www.bizimpullar.az, edu.e-cbar.az, www.infobank.az) barədə ətraflı məlumat da verilmişdir. Sonda proqram iştirakçılarına sertifikatlar təqdim olunmuşdur.
