“Azərbaycan Mikromaliyyə Assosiasiyası” (AMFA) İctimai Birliyinin üzvü olan bank və bank olmayan kredit təşkilatlarının (BOKT) əsas çağırışlarından biri maliyyələşmə imkanlarının genişləndirilməsidir.
BBN.az xəbər verir ki, bu barədə AMFA-nın icraçı direktoru Jalə Hacıyeva “Report”a açıqlamasında bildirib.
Onun sözlərinə görə, problem xüsusilə yerli valyutada vəsaitlərin cəlb edilməsi ilə bağlıdır. İndiyədək institusional investorlar əsasən xarici valyutada investisiya kapitalı təqdim ediblər. Lakin resursun daha ucuz və əlçatan olması üçün onun yerli valyutada cəlb olunması vacibdir.
J.Hacıyeva qeyd edib ki, bu istiqamətdə “Bakı Fond Birjası” və “Azərbaycan Kapital Bazarları Assosiasiyası” ilə müzakirələr aparılır. İnvestor–Mikromaliyyə Forumunun keçirilməsində məqsəd isə investisiya şirkətlərini və onların müştərilərini BOKT-ların istiqrazlarına yatırım etməyə təşviq etməkdir.
“Bu, ölkədə mikrosahibkarlığın inkişafına təkan verəcək. Çünki maliyyə resurslarına tələb təklifdən daha çoxdur”, – deyə o vurğulayıb.
AMFA rəsmisinin sözlərinə görə, BOKT-ların istiqrazlar üzrə təklif etdiyi illik gəlirlilik təxminən 15% səviyyəsindədir ki, bu da depozit faizlərindən yüksəkdir. İstiqrazlara investisiya etməklə investorlar portfellərini diversifikasiya edə, eyni zamanda özünüməşğulluğun və regionlarda sahibkarlığın inkişafına dəstək göstərə bilərlər. O bildirib ki, forum ölkədə fəaliyyət göstərən 54 BOKT üçün kapital resurslarına çıxış baxımından mühüm platforma rolunu oynayacaq.
J.Hacıyeva əlavə edib ki, AMFA mikromaliyyə bazarının dayanıqlılığının artırılması üçün təkliflər verir və AMB-nin təsdiqlədiyi Strateji Çərçivə Sənədi üzrə işçi qruplarında iştirak edir. Bu çərçivədə kibertəhlükəsizlik, kredit risklərinin idarə edilməsi, çirkli pulların yuyulmasına qarşı mübarizə, rəqəmsallaşma və korporativ idarəetmədə texniki bacarıqların artırılması istiqamətlərində işlər aparılır.
