AQEM yanında İşgüzar Şuraya 2025-2026-cı illərdə KOBİA sədrlik edəcək

İşgüzar dairələr arasında əməkdaşlığın gücləndirilməsi, qarşılıqlı fəaliyyət üçün yeni imkanların araşdırılması, KOB-ların inkişafına dəstək məsələləri 2025-2026-cı illərdə İşgüzar Şuranın gündəliyində duran məsələlərdir.

Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) yanında İşgüzar Şuraya 2025-2026-cı illərdə Kiçik və Orta Biznesin İnkişafı Agentliyi (KOBİA) sədrlik edəcək.

AQEM-in İşgüzar Şurasının onlayn formatda keçirilmiş iclasında KOBİA nümayəndələri də iştirak ediblər. İclasda KOBİA-nın İdarə Heyətinin sədri Orxan Məmmədov 2025-2026-cı illərdə AQEM-ə Azərbaycanın sədrliyi dövründə İşgüzar Şuranın gündəliyinə dair fikirlərini bölüşüb. Qeyd edilib ki, KOBİA-nın İşgüzar Şuraya sədrliyi dövründə iştirakçı ölkələrin işgüzar dairələri arasında əməkdaşlığın daha da gücləndirilməsi, qarşılıqlı fəaliyyət üçün yeni imkanların araşdırılması, kiçik və orta biznesin inkişafına dəstək məsələləri diqqət mərkəzində olacaq.

İclasda cari məsələlərlə yanaşı, İşgüzar Şuranın iclasının və biznes forumun keçirilməsinə dair də fikir mübadiləsi aparılıb.

Qeyd edək ki, AQEM-in bu il mart ayında qəbul etdiyi qərarla Azərbaycan 2025-2026-cı illər üzrə təşkilatın sədri seçilib. Hazırda təşkilatın 28 üzvü var.