Avropa Statistika İdarəsi (Avrostat) iyun ayına dair Avropa İttifaqı (Aİ) və Avrozonada pərakəndə satışlara dair son rəqəmləri açıqlayıb.
BBN.az xəbər verir ki, iyun ayında həm Aİ-də, həm də Avrozonada pərakəndə satış həcmi əvvəlki ayla müqayisədə 0,3% artıb. İllik müqayisədə də satışlarda hər iki iqtisadi zonada 3,1%-lik artım müşahidə olunub. Bu göstərici, xüsusilə Avrozona üçün, son 9 ayın ən yüksək illik artım səviyyəsi kimi qeyd edilir.
Bloomberg-in sorğusuna əsasən, iqtisadçılar satışlarda aylıq 0,3% və illik 2,6% artım gözləyirdilər. Lakin reallıqda illik artım proqnozları üstələyib.
Aİ ölkələri arasında iyun ayında pərakəndə satışların ən yüksək aylıq artımı 10% ilə Şimali Makedoniyada baş verib. Ardınca Xorvatiya (3,6%) və İsveç (2,6%) gəlir. Ən çox azalma isə Fransa, Sloveniya və Polşada qeydə alınıb.
İllik əsasda isə satışların lider artımı 13,1% ilə yenə Şimali Makedoniyada müşahidə olunub. Kipr (8,7%) və Xorvatiya (7,4%) da yüksək artım göstərən ölkələr sırasındadır. Əksinə, Finlandiya və Slovakiya illik satışlarda geriləmə yaşayan ölkələr olub.
