Bu ilin yanvar-fevral aylarında Azərbaycanda 85 614 ədəd “ASAN İmza” elektron imza sertifikatı verilib.
Bu barədə İqtisadiyyat Nazirliyi yanında Dövlət Vergi Xidmətindən bildirilib.
Məlumata görə, bu göstərici ötən ilin eyni dövrü ilə müqayisədə 0,1 % azdır.
Hesabat dövründə “ASAN İmza” sertifikatları 54 844 müraciət əsasında təqdim olunub ki, bu da bir il əvvələ nisbətən 5,8 % azdır.
Qeyd olunub ki, “ASAN İmza” elektron imza sertifikatlarının üç növü mövcuddur: fiziki şəxslər (vətəndaşlar), hüquqi şəxslər və sahibkarlıq fəaliyyəti ilə məşğul olan fiziki şəxslər, həmçinin dövlət qulluqçuları üçün nəzərdə tutulan sertifikatlar.
Fiziki şəxslər üçün elektron imza sertifikatları şəxsi istifadə məqsədi daşıyır. Hüquqi şəxslər və sahibkarlar, eləcə də dövlət qulluqçuları üçün nəzərdə tutulan sertifikatlar isə kommersiya və ya dövlət təşkilatını təmsil etmək və onun adından çıxış etmək səlahiyyəti verir.
Bildirilib ki, “ASAN İmza” elektron imza sertifikatlarının etibarlılıq müddəti 3 ildir.
