Azərbaycanın elektroenergetika sistemində bərpa olunan enerjinin payının artırılmasına texniki yardım layihəsi həyata keçiriləcək

Energetika naziri Pərviz Şahbazov Dünya Bankının Azərbaycan üzrə ölkə meneceri Sara Mayklın rəhbərlik etdiyi nümayəndə heyətini qəbul edib.

Görüşdə Dünya Bankının dəstəyi ilə “CESİ” məsləhətçi şirkəti tərəfindən həyata keçiriləcək “Azərbaycanın elektroenergetika sistemində bərpa olunan enerjinin payının artırılmasına texniki yardım” layihəsi nəzərdən keçirilib, layihə üzrə görüləcək işlər, atılacaq addımlar müzakirə edilib.

Qeyd edək ki, layihənin əsas məqsədi Azərbaycanda bərpa olunan enerji mənbələri hesabına əldə olunacaq elektrik enerjisinin şəbəkəyə ötürülməsi ilə əlaqədar müvafiq təhlillərin aparılması və hesabatın hazırlanmasıdır. Bu çərçivədə istehsalın və ötürücü şəbəkənin 2035-ci ilədək perspektiv inkişafına dair əlaqələndirilmiş planın hazırlanması da nəzərdə tutulur.

Layihə üzrə aidiyyəti dövlət qurumları və digər maraqlı tərəflərin ilkin görüşü cari ilin 17 may tarixində keçiriləcəkdir.