2025-ci ilin yanvar-iyul aylarında Azərbaycanda pərakəndə ticarət şəbəkəsində istehlakçılara ümumilikdə 35,1 milyard manatlıq məhsul satılıb. Bunun 19,3 milyard manatı ərzaq məhsulları, içkilər və tütün məmulatlarının, 15,8 milyard manatı isə qeyri-ərzaq mallarının payına düşüb.
BBN.az Dövlət Statistika Komitəsinə istinadən xəbər verir ki, ötən ilin eyni dövrü ilə müqayisədə pərakəndə ticarət dövriyyəsi real ifadədə 3,8 % artıb. Artım ərzaq məhsulları, içkilər və tütün məmulatları üzrə 1,4 %, qeyri-ərzaq malları üzrə isə 6,7 % təşkil edib.
Hesabat dövründə pərakəndə ticarət xərclərinin strukturu belə olub:
-
50,5 % – ərzaq məhsulları
-
4,4 % – içkilər və tütün məmulatları
-
12,7 % – toxuculuq məhsulları, geyim və ayaqqabılar
-
6 % – avtomobil benzini və dizel yanacağı
-
4,7 % – elektrik malları və mebellər
-
2,5 % – əczaçılıq məhsulları və tibbi ləvazimatlar
-
1,2 % – kompüterlər, telekommunikasiya avadanlıqları və çap məhsulları
-
18 % – digər qeyri-ərzaq malları
İlkin hesablamalara görə, qeyri-dövlət sektorunun payı ümumi pərakəndə ticarət dövriyyəsində 99,8 % təşkil edib və bu göstərici ötən illə müqayisədə real ifadədə 3,8 % artıb. Müəssisələr üzrə satış həcmi 7,9 %, fərdi sahibkarlar üzrə 1 %, bazar və yarmarkalarda isə 4,3 % yüksəlib.
Əhali üzrə orta aylıq xərclər 490 manat olub ki, bunun 269 manatı ərzaq məhsulları, içkilər və tütün məmulatlarına, 221 manatı isə qeyri-ərzaq mallarına sərf edilib.
