Azərbaycan, 2025-ci ilin ilk yarısında Türkiyə iqtisadiyyatına ən çox birbaşa xarici investisiya yatıran ölkələr sırasında yer alıb.
BBN.az xəbər verir ki, bu barədə Türkiyə Prezident Administrasiyasının İnvestisiya və Maliyyə İdarəsinin rəhbəri Burak Dadlıoğlu cari ilin yanvar-iyun aylarında qardaş ölkəyə yatırılan investisiyalarla bağlı açıqlamasında məlumat verib.
Onun sözlərinə görə, bu dövrdə Türkiyəyə ən böyük birbaşa xarici investisiya Niderlanddan daxil olub. Siyahıda növbəti yerləri Qazaxıstan, ABŞ, Almaniya və Azərbaycan tutub.
“İlin birinci yarısında Türkiyəyə ümumilikdə 6,3 milyard dollar birbaşa xarici investisiya yatırılıb ki, bu da ötən ilin eyni dövrünə nisbətən 27,1 % çoxdur. Bu rəqəm investorların hökumətin iqtisadi proqramına inamının növbəti sübutudur”, – deyə Burak Dadlıoğlu bildirib.
Türkiyə Xarici İnvestorlar Dərnəyinin (YASED) məlumatına əsasən, 2025-ci ilin yanvar-iyun aylarında ölkəyə yönələn birbaşa xarici investisiyaların 5 %-i Azərbaycanın payına düşüb.
Ümumilikdə, 2002-ci ildən bu günə qədər Türkiyə iqtisadiyyatına 281 milyard dollar birbaşa xarici investisiya yatırılıb.
