Azərbaycanda mənzillərin kirayəyə verilməsi vergiyə cəlb olunan əməliyyat sayılır, lakin bu sahədə qeyri-rəsmi fəaliyyət hələ də geniş yayılıb. İqtisadiyyat Nazirliyi yanında Dövlət Vergi Xidmətinin məlumatına görə, kirayə bazarında şəffaflığın artırılması üçün bir sıra dəyişikliklər hazırlanır.
Məlumata əsasən, prosesin rəsmiləşdirilməsi üçün inzibatçılığın sadələşdirilməsi və kirayə gəlirləri üzrə vergi yükünün azaldılması nəzərdə tutulur.
2025-ci il yanvarın 1-dən kirayə gəliri əldə edən şəxslərə vergi orqanında uçota durmadan agent (hüquqi və ya fiziki şəxs) təyin etmək imkanı veriləcək. Bu agent vergi öhdəliklərinin icrasını kirayə verən şəxs adından həyata keçirəcək.
Şəffaflığın artırılması və könüllü əməletməyə nail olmaq üçün fiziki şəxslərin digər fiziki şəxslərə kirayə verdiyi yaşayış sahələrindən əldə olunan gəlirlərə tətbiq edilən vergi dərəcəsinin 14%-dən 10%-ə endirilməsi nəzərdə tutulur. Bu dəyişiklik vergi yükünün təxminən 30% azalması deməkdir.
Hüquqi şəxslərə kirayə və sahibkarlıq fəaliyyəti üzrə vergi dərəcəsi dəyişmir
Sahibkarlıq fəaliyyəti çərçivəsində kirayəyə verilən və ya hüquqi şəxslərə icarəyə təqdim olunan əmlaklar üzrə 14%-lik vergi dərəcəsi əvvəlki kimi qüvvədə qalır.
Dəyişikliyin əsas məqsədi vergidən yayınmanın qarşısını almaq, kirayə müqavilələrinin rəsmiləşdirilməsini genişləndirmək və bazarda şəffaflığı artırmaqdır.
