Bu ilin yanvar-may aylarında “Bakı Fond Birjası” (BFB) QSC-də bütün maliyyə alətləri üzrə bağlanmış əqdlərin ümumi dəyəri 19 milyard 424,95 milyon manat təşkil edib.
Bu göstərici ötən ilin eyni dövrü ilə müqayisədə 42,7 % azdır.
Hesabat dövründə birjada bağlanmış əqdlərin sayı da azalma nümayiş etdirib. Belə ki, son bir ildə əqdlərin sayı 11,8 % azalaraq 11 460-a düşüb.
Birjanın ümumi dövriyyəsinin əsas hissəsini repo əməliyyatları təşkil edib. Yanvar-may aylarında repo əməliyyatlarının həcmi 17 milyard 500,811 milyon manat olub ki, bu da ümumi dövriyyənin 90,1 %-nə bərabərdir. Bununla yanaşı, repo əməliyyatlarının dəyəri illik müqayisədə 39,8 % azalıb.
Dövlət qiymətli kağızları bazarında da geriləmə qeydə alınıb. Bu seqment üzrə əqdlərin dəyəri 2,7 dəfə azalaraq 1 milyard 311,091 milyon manat təşkil edib.
Korporativ qiymətli kağızlar bazarında bağlanmış əqdlərin dəyəri isə 2,1 dəfə azalaraq 613,048 milyon manata enib.
Məlumatlar göstərir ki, 2026-cı ilin ilk beş ayında Bakı Fond Birjasında həm əməliyyat həcmi, həm də əqdlərin sayında azalma müşahidə olunub.